Европската агенција за лекови (ЕМА) додаде екстремно ретко невролошко нарушување, синдром Гилен-Баре (ГБС), на листата на можни несакани ефекти од вакцината против коронавирус Астра Зенека.
ЕМА во средата објави дека врската помеѓу GBS и вакцината Астра Зенека е барем „разумна можност“, бидејќи се пријавени 833 случаи на синдром откако се дадени 592 милиони дози на вакцината ширум светот од 31 јули.
ЕМА го категоризираше овој несакан ефект како „многу редок“, што е најниската фреквенција што може да го има несаканиот ефект.
Агенцијата посочи дека придобивките од вакцината Астра Зенека се уште ги надминуваат ризиците.
Американската администрација за храна и лекови (ФДА) издаде предупредување дека GBS е можен несакан ефект на вакцината Џонсон и Џонсон. И двете вакцини користат векторска технологија и се поврзани со ретки случаи на згрутчување на крвта.
ЕМА, исто така, додаде повеќе безопасни несакани ефекти на вакцините Џонсон и Џонсон, Модерна и Астра Зенека, како што се болка во рацете, нозете и стомакот и симптоми слични на грип.
