На почетокот на новата академска година, студентите во Северна Македонија добиваат подобри услови за престој, учење и студирање преку низа инвестиции во студентскиот стандард и образовната инфраструктура.

Во изминатите две години Владата го постави студентскиот стандард и образовната инфраструктура меѓу приоритетите, со инвестиции што опфаќаат реконструкција на студентските домови, зголемување на капацитетите за сместување, модернизација на факултетите, опремување на лабораториите и дигитализација на услугите.

 

 

Конкретен резултат е реконструираниот студентски дом „Стив Наумов“, кој е пуштен во употреба со капацитет од 1.150 легла. По неговата целосна реконструкција, студентите добиваат обновен простор и подобри услови за престој и учење.

Во текот на следниот период се очекува да биде ставен во употреба и целосно реконструираниот студентски дом „Кузман Јосифовски – Питу“, со дополнителни 280 места. За двата дома се вложени околу 20 милиони евра, со финансиско учество на Владата, Германската развојна банка и Европската Унија.

Ова не е изолиран проект. Двата дома се дел од поширока програма вредна 86 милиони евра, која предвидува реконструкција на девет државни студентски домови, шест училишта со ресурсни центри и еден ученички дом. Финансиската конструкција предвидува 60 милиони евра заем од KfW, 22 милиони евра неповратни средства од Европската Унија и околу 4 милиони евра од буџетот на Министерството за образование и наука.

Така, по години во кои студентските домови беа едно од отворените прашања во образовниот систем, започнува системска реконструкција на нивната инфраструктура.

Паралелно се отвора и прашањето со недовршените универзитетски објекти.

Двете згради кај Ректоратот на УКИМ, чија изградба беше запрена по стечајот на изведувачот, повеќе од една деценија стоеја недовршени. Наместо дополнително одложување, Министерството пристапи кон стручна анализа на нивната состојба и подготовка на ново проектно решение.

Двата објекта ќе бидат наменети за ФИНКИ, со современо решение и поврзување со мост, а паралелно се планира и изградба на нов објект за Факултетот за физичко образование, спорт и здравје.

Особено значајно е што овој процес не се сведува на продолжување на стар проект. Поради долгогодишното стоење на објектите и променетите стандарди и потреби, направена е стручна анализа со учество на повеќе единици на УКИМ и релевантни инженерски институции, по што се пристапува кон репроектирање.

На тој начин, проблем кој со години стоел нерешен се трансформира во проект за современа универзитетска инфраструктура.

Инвестициите не завршуваат со зградите.

Во изминатиот период се инвестира и во опремување на лабораториите и нагледните средства на факултетите, односно во условите во кои студентите практично го стекнуваат своето знаење.

Паралелно се спроведува и дигитализација на услугите. Стипендиите, сместувањето во студентските домови, јавните повици и други административни процеси се дигитализираат, со цел студентите да добијат поедноставен и поефикасен пристап до услугите на институциите.

Следниот чекор е дополнително проширување на дигиталните процеси, со цел услугите на Министерството за образование и наука да станат целосно дигитализирани.

Фокусот е и на квалитетот на образованието.

Покрај инфраструктурата, Министерството работи на промени во системот на високото образование, научноистражувачката дејност и механизмите за обезбедување квалитет.

Најавени се нови законски решенија, построги критериуми за напредување во академски звања, како и нови алатки за откривање плагијати и несоодветно преземање туѓи трудови.

Во исто време, се отвора и темата за примената на вештачката интелигенција во образованието. Во соработка со високообразовни институции и приватниот сектор се спроведуваат обуки за наставници, со цел новите технологии да се користат како алатка за подобрување на наставата, но и за развивање критичко и креативно размислување кај учениците и студентите.

Студентскиот стандард не е само прашање на бројот на легла.

Подобриот студентски стандард подразбира и услови за живеење, современи простории за учење, опремени лаборатории, функционални факултетски згради, дигитални услуги и квалитетно образование.

Токму затоа Владата инвестициите ги поставува во поширока рамка на модернизација на образовниот систем.

Според податоците презентирани од премиерот Христијан Мицкоски, во изминатите 26-27 месеци се инвестирани повеќе од 90 милиони евра во образовната инфраструктура, додека дополнителни околу 45 милиони евра се насочуваат преку програмата за децентрализирање средства кон општините за проекти во образованието.

На почетокот на новата академска година, највидливиотпример за оваа политика е „Стив Наумов“ – студентски дом кој од дотраен објект повторно станува функционален простор за 1.150 студенти.

Но, уште поважно е што овој проект е дел од поширок процес: реконструкција на студентските домови, решавање на долгогодишните инфраструктурни проблеми на факултетите, инвестиции во опрема и лаборатории и дигитализација на услугите.

За студентите тоа значи дека подобрувањето на стандардот не останува само на ниво на најави, туку постепено се гледа и во конкретни објекти, капацитети и услуги.