Сојузот на стопански комори не го поддржува предлогот за намалување на бројот на неработни денови и државни празници. Претседателот Горан Ѓорѓиевски оцени дека вниманието треба да се насочи кон зголемување на продуктивноста, а не кон автоматско продолжување на годишниот број работни денови.
Од Сојузот предлагаат да се отвори расправа за модели на плаќање по работен час, со поголема флексибилност при распоредувањето на работното време. Според нив, тоа би можело да им помогне на дел од работниците подобро да ги усогласуваат семејните и професионалните обврски.
И Министерството за економија и труд смета дека треба да се разгледаат искуствата на развиените економии. Засега нема усвоен нов модел на пресметување плати, ниту одлука за кратење на празниците.