Ковачевски: СДСМ има визија за иднината и ги исполнува ветувањата – 130% повисоки плати и 50% повисоки пензии

Претседателот на СДСМ, Димитар Ковачевски, во интервју за Слободен печат, посочува дека на македонската политичка сцена јасно се профилирани два политички блока. Едниот е политичкиот блок предводен од СДСМ, којшто иднината на земјата ја гледа интегрирана во ЕУ и кој што освен визијата за иднината ги исполнува ветувањата, како што се зголемување платите и пензиите, ги враќа парите кај граѓаните и ја развива економијата да има повеќе за сите.

Ковачевски потенцира дека Владата предводена од СДСМ, го надмина изборното ветување од 500 евра за просечна плата, но и дека денес имаме рекордна минимална плата.

„Во 2017 година просечна плата беше 360 евра, денеска ние успеавме да ја зголемиме и изнесува 630 евра. Имаме воедно и рекордна минимална плата од над 22.500 денари колку што ќе е со следното усогласување, а минималната плата во времето на владите на ВМРО-ДПМНЕ беше 8.000 денари. Значи над 130% повеќе. Платите во ТИРЗ зоните пак веќе се над 1.000 евра“, вели Ковачевски.

Зборувајќи за подобрување на животниот стандард за пензионерите, Ковачевски во интервјуто, посочува дека денес пензиите се зголемени за 50%, споредено со времето на ВМРО ДПМНЕ.

“Имаме и историско ниво на пензии – просечната пензија е околу 20.000 денари, минималната е 13.000 денари, зголемени за 50% во споредба со времето на ВМРО-ДПМНЕ“, рече Ковачевски.

При тоа, Ковачевски во интервјуто потенцираше дека стапката на невработеност денес е под 13%, за разлика од 2016 кога беше над 24%, а само во една година стапката на вработеност е зголемена со нови 10.000 вработени во државата.

“Тоа се видливи и мерливи економски показатели. Вториот блок е антиевропскиот предводен од ВМРО-ДПМНЕ. Со политиките на тој блок до 2017 година Северна Македонија беше заробена држава, изолирана, со уназадена демократија, далеку од ЕУ и НАТО. Земја во која наместо кај граѓаните, парите одеа во стиропор кој денеска се распаѓаат, работникот беше потценет, третиран и продаван во светот како евтина работна сила“, рече претседателот на СДСМ, Димитар Ковачевски, во интервјуто за Слободен печат.