Staphylococcus aureus е бактерија која најчесто ја населува кожата и мукозната мембрана на носот кај здрави луѓе. Оваа бактерија може да предизвика болест под одредени околности. Меѓу другото, Staphylococcus aureus произведува токсини кои можат да предизвикаат труење со храна.

Производство на токсини
Контаминација на храната со стафилококи и токсини се јавува при складирање, преработка, подготовка или дистрибуција. Најчесто се јавува преку рацете на луѓето кои подготвуваат храна и преку приборот за подготовка на храна, како што се ножеви, даски за сечење, садови во кои се чува храната.

Услови кои го фаворизираат производството на токсини во храната контаминирана со стафилокок:

– несоодветно складирање на храната по подготовката

– подготовка на храна долго пред консумирање

– недоволно зготвена или загреана храна

– продолжено загревање на ринглите при послужување храна.

Труењето со стафилокок може да се случи спорадично, во домашни услови и епидемиски, по консумирање храна во угостителски објекти.

Болеста е генерално блага
Епидемиите се најчести во лето, кога температурите се високи и храната не се чува правилно. Најризични намирници се меленото месо, пудинг, сладолед, сендвичи.

Труењето со храна предизвикано од стафилококни токсини се карактеризира со краток период на инкубација до осум часа, тешка мачнина, повраќање и дијареа, без појава на покачена телесна температура.

Болеста е генерално блага, а закрепнувањето се случува во рок од еден до три дена. Третманот се состои од замена на течности, антиспазмодични лекови и одмор.

Превентивни мерки:

– лицата кои ракуваат со храната за време на подготовката и дистрибуцијата (готвачи, келнери) мора да се придржуваат до општите хигиенски мерки за да се спречи контаминација на храната

– темелно миење на рацете, особено под и околу ноктите, со сапун и проточна вода пред да започнете со работа со храна

– не учествувајте во подготовката на храната доколку имате рани или инфекции на кожата на рацете

– Чувајте ги работните површини и приборот за подготовка на храна чисти

– доколку храната нема да се конзумира во рок од два часа од подготовката, чувајте ја на температура над 60 степени или под пет Целзиусови степени.