„Србија покажа дека ни е братска земја во време на кризата од коронавирусот, кога ни беше најтешко, кога баравме, а не можевме да најдеме начин за заштита на нашите лекари и медицински сестри. Само Србија од своите залихи одвои за нашиот народ“ кажа премиерот Зоран Заев во интервју за српски Танјуг.
Тој додаде дека пријателство е кога делиш со својот сосед, пријател, брат кога е тешко, а токму тоа Србија го направи за време на коронакризата.
„На актуелните анкети се поставува и прашањето која земја нашиот народ ја гледа како најголем пријател. Дури 38 проценти сметаат дека Србија ни е најголем пријател. Србија отсекогаш бил голем пријател на Северна Македонија и мило ми е што ова пријателство расте“ кажа Заев.
Премиерот на Северна Македонија истакна дека Македонците и Србите се братски народ, со исти предизвици, вредности, исти цели, желби и фантазии.
Заев истакна дека се надева оти Белград и Приштина ќе постигнат решение прифатливо за Србите и Албанците кое ќе гарантира мир, европска иднина и почитување на малцинските права.
