Забавено се одвива темпото на вакцинација неделава, бидејќи има сосема доволен број вакцини за ревакцинација, но мал е бројот на вакцини кои како прва доза би им се дале на заинтересираните граѓани. Министерот за здравство Венко Филипче денеска изјави дека во земјава има околу 230.000 вакцини наменети за ревакцинација на оние лица кои веќе примиле прва доза, додека под 10.000 вакцини се наменети за аплицирање на прва доза на граѓаните кои чекаат на ред за да бидат имунизирани.
Филипче очекува дека наредната недела ќе пристигнат 20.000 дози вакцини како донација од Грција, како и 50.000 дози вакцини што ќе бидат донација од Бугарија. Со овие вакцини, се очекува да се засили темпото на вакцинација во земјава. Воедно, министерот рече дека во јуни треба да се зголеми бројот на дози на вакцини што на неделно ниво ќе пристигнуваат секој понеделник од „Фајзер/Бионтек“. Филипче во јуни очекува да пристигнат вакцини преку КОВАКС механизмот, како и кинеските вакцини.
Иако на почетокот од годинава беа порачани и 200.000 дози од руската вакцина „Спутник В“, сепак Филипче денеска изјави дека нема конкретни податоци кога би пристигнале овие вакцини. Тој спомена дека разговарал и со рускиот амбасадор во Скопје, но и со претставници од московскиот институт, но засега не може да каже кога би пристигнале овие вакцини.
Исто така, Филипче денеска информираше дека Србија нема да може да ги извезе потребните количини на вакцини „Астра Зенека“ потребни за втора доза за пациентите над 60 години, кои изминатава пролет примија прва доза во Србија. Ова значи дека во земјава за овие граѓани ќе се лансира нов сајт „Ревакцинација.мк“, на кој тие ќе можат да се пријават, додека за нивната ревакцинација ќе се обезбедат дози од веќе пристигнатите вакцини на „Астра Зенека“ во земјава.
Во однос на вакцинирањето, Филипче појасни дека изминатиов период завршила вакцинацијата на сите трансплантирани пациенти и пациентите на дијализа. Во тек е вакцинацијата на пациенти со ретки болести, а следни на ред се лицата со хронични белодробни заболувања.
Министерот Филипче додаде дека неделната инциденца опаѓа, и во моментов изнесува околу 35 активни случаи на ковид-19 на 100.000 жители. Тој очекува многу брзо да ја достигнеме фазата „спорадично ширење на болеста“, односно инциденца од под 20 случаи на 100.000 жители. Тогаш би следувало и следно олабавување на мерките. Сепак, и доколку успееме да стигнеме до ваквата инциденца, Филипче рече дека тоа нема да ги измени критериумите за влез во странските земји на македонските граѓани, односно ќе треба и понатаму да се прават ПЦР тестови, или да има доказ за примени две дози на вакцина.
Министерот за здравство повтори дека претстојново лето ќе работат на соодветен протокол којшто ќе овозможи учениците и студентите да се вратат со физичко присуство на настава од 1 септември. Ја разгледуваат и можноста за вакцинација на учениците на возраст од 12 до 16 години, која сепак не би била задолжителна. Сепак, Филипче дополни дека тековната учебна година учениците би ја завршиле со онлајн настава.
Во однос на предлозите за ублажување на мерките од Комисијата за заразни болести за периодот по 1 јуни, Филипче спомена дека полицискиот час ќе остане на сила, за да се ограничат дополнителните групирања во ноќните часови. Во случаите на организирање свадби, ќе биде дозволена музика во угостителските објекти, но за организирање на концерти и други настани со позначителен број на присутни лица засега не е време да се дозволат.
Филипче информираше состојбата во болниците низ земјата е значително подобрена, работат само инфективните одделенија во кои се сместени ковид пациенти и нема повеќе потреба од ротација на медицински кадар.
