Денеска (28.03.2023), министерот за внатрешни работи Оливер Спасовски, заедно со државниот секретар г-ѓа Магдалена Несторовска одржаа работна средба со амбасадорите на Кралството на Шпанија и на Делегацијата на ЕУ во Република Северна Македонија, Н.Е. Хозе Луис Лозано Гарсија и Н.Е. Дејвид Гир.
На средбата двајцата амбасадори ги поздравија искрените напори на Република Северна Македонија во процесот на преговори со ЕУ и успешноста на билатералниот состанок со Европската Комисија. Притоа, амбасадорот Гарсија, чија што земја во јуни годинава ќе го преземе претседавањето со Советот на Европската Унија даде предлог следниот Министерски форум на ЕУ и Западен Балкан – за правда и внатрешни работи – што се планира да биде одржан во октомври 2023 година, да се одржи токму во Скопје, односно негов домаќин да биде Република Северна Македонија.
Од своја страна, пак, министерот Спасовски заблагодарувајќи им се на амбасадорите Гарсија и Гир за досегашната успешна соработка и партнерство на нашиот пат кон полноправно членство во Унијата, нагласи дека за нас ќе преставува голема чест да бидеме домаќини на ваков голем и важен настан, со што дополнително ќе се испрати силна и цврста порака кон земјите членки на ЕУ за европски аспирации на Република Северна Македонија, посебно во областа на правдата и внатрешни работи.