Се чини дека Пентагон во вторникот го отфрли предлогот на Полска нивните борбени авиони МиГ-29 да бидат достапни на Соединетите држави во базата во Германија, како одговор на повикот на Украина за испорака на борбени авиони, велејќи дека тоа не е „одржливо“.
Портпаролот на Пентагон Џон Кирби изјави дека можноста авиони од базата на САД и НАТО во Германија „да летаат во воздушниот простор над Украина, која е во конфликт со Русија, предизвикува сериозна загриженост за целата НАТО алијанса“.
„Ќе продолжиме да се консултираме со Полска и со другите наши сојузници во НАТО за ова прашање и тешките логистички предизвици што тоа ги поставува, но не веруваме дека предлогот на Полска е одржлив“, рече Кирби.
Полското Министерство за надворешни работи во вторникот соопшти дека Полска е подготвена да ги испрати сите свои авиони МиГ-29 во воздухопловната база Рамштајн во Германија и да ги стави на располагање на Соединетите држави, и ги повика другите членки на НАТО кои го поседуваат тој тип да го сторат истото.
Полска претходно не се консултираше со Вашингтон за одлуката, изјави во вторникот американскиот државен потсекретар Викторија Нуланд, иако американската администрација разговараше за барањето на Украина да и се дадат полски авиони.
