Агентите што беа откриени како руски шпиони во бугарската Државна агенција „Национална безбедност“ (ДАНС), работеле против добрососедските односи на Бугарија со Северна Македонија и со Западниот Балкан, изјави бугарскиот премиер Кирил Петков во интервју за софиски „24 Часа“.
– Тука треба сите да се замислиме зошто руската држава инвестирала средства преку нејзината шпионска мрежа за таа цел, вели Петков.
Според него, сите треба да се запрашаат дали долгорочен бугарски интерес е Северна Македонија да стане дел од ЕУ или да „остане една исклучена земја“.
– Според мене тоа се важни прашања за кои треба да се замислиме, уште повеќе кога има тенденција дека некој работи против тоа. Дали навистина бугарски интерес е Република Северна Македонија да се оддалечува од членство во ЕУ или пак тоа е руски интерес, кој не сака да го види целиот Балкан стабилен и дел од Европа, истакнува Петков за „24 Часа“.
На истата тема во интервју за телевизијата БТВ, Пеков нагласи дека е очигледно оти има руско мешање во Бугарија поврзано со Западниот Балкан и Северна Македонија.
– Во овој скандал станува збор за руски интереси. Луѓето кои беа вмешани работеа во многу специфичен правец, а тоа е Западниот Балкан да нема европска иднина и нашите односи – односите меѓу Република Северна Македонија и Бугарија, да не бидат толку пријателски, какви што би сакале да бидат како меѓу едни добри соседи, вели Петков за БТВ.
Дали и во Македонија има руски шпиони кои слободно се шетаат и работат против зачленување на Македонија во ЕУ?
Инаку засега не е познато дали и во Македонија има руски шпиони кои слободно шетаат низ земјава и работат против зачленување на Македонија во ЕУ.
Во периодот пред зачленувањето на Македонија во НАТО, сведоци бевме на чудни настани кои ја опструираа таа активност.
Интересно е што на повиците за бојкот на пописот меѓудругите се вршеа и од анти-западни лица, кои јавно прокламираат анти-западна политика во Македонија.
