Министерот за надворешни работи, Бујар Османи како домаќин и организатор на најголемата меѓународна конференција што Северна Македонија некогаш ја има организирано, денеска за време на одржувањето на Преспа форум дијалог, во Охрид имаше прес-конференција, тематски посветена на овој настан.
Оваа конференција на едно место го собра целиот регион, собра влијателни претставници на Европската Унија, претставници на бројни мултилатерални организации, на регионалните иницијативи, претставници на земји-членки на Унијата, на САД, итн. Највлијателните невладини организации, аналитичари, академски претставници се дојдени денеска во Охрид и Отешево, обединети под закрилата на Преспа форум дијалог.
Османи информираше дека денеска на едно место имаме претседатели на држави, премиери, повеќе од 20 министри, не само од регионот, туку од цела Европа и САД. Повеќе од 100 странски новинари кои го покриваат настанот, што зборува за важноста на истиот и во тој контекст нагласи дека ехото од Охрид и Преспа ќе одекне силно и далеку низ светот.
„Охрид не случајно е избран за место на одржување на овој настан, кој носи двојна симболика. Тука бевме пред 20 години, кога се потпиша историскиот Охридски рамковен договор, кој ги постави темелите и го отвори патот за следните два договора што дојдоа подоцна, Преспанскиот со Грција и Договорот за пријателство со Бугарија. Ние изградивме ваква платформа врз основите на трите договори, впрочем тоа се темелите и трите пресвртници на нашиот пат кон градење на нашата модерна, демократска држава, а заедничкиот именител на трите договори е тоа што сите се постигнати преку дијалог. Токму тие ја презентираат нашата автентична приказна и служат како инспирација за воспоставување на дијалогот во Преспанскиот форум, како платформа за унапредување на помирувањето, градење, доверба и политички дијалог“, истакна Османи.
Министерот информираше дека на форумот ќе преовладуваат теми за дипломатијата за меѓународните односи, геополитичката реалност и современи предизвици, дека ќе се направи обид да се најде начин да се вметне делот што недостасува и да ја направиме Европа целосна, што впрочем е темата на оваа конференција, да се разговара за европското парче кое недостасува.
Османи нагласи дека Панелот за иднината на Европа е пионерски пробив за вклученоста на земјите од Западен Балкан во оваа конференција, кој заедно со Европската служба за надворешна и безбедносна политика и цивилното општество од регионот, но и од Германија го испраќаат гласот на регионот за овоj настан.
„Како што веќе посочив, ова е далеку најголемиот настан што сме го организирале, што претставуваше предизвик од секаков аспект: од оргaнизационо-технички, протоколарен, па се до политички предизвик, да се биде домаќин на највисоки гости од регионот, од Европа, па дури од САД. Тука ќе завршам и Ве повикувам да продолжиме да ги следиме содржините на оваа конференција, размената на мислења, на идеи, кои ќе донесат плодни заклучоци и кои ќе остават печат не само на земјава и на целиот регион“, заклучи Османи.
The post Османи: Ехото од Охрид и Преспа ќе одекне силно и далеку низ светот appeared first on Centar.mk – Вести, бизнис, забава, спорт….
