Делта сојот на коронавирусот, за само неколку недели, го надмина алфа сојот и стана доминантна варијанта на коронавирусот во Словенија.
Имено, во последниот круг на секвенционирање, делтата е потврдена во дури 89 проценти од примероците, според податоците објавени денес од Словенечката национална лабораторија за здравје, животна средина и храна, пренесува СТА.
Делта сојот, првпат откриен во Индија, беше потврден во Словенија за прв пат пред пет недели, а дури минатата недела имаше мал удел во инфекциите.
Ненадејното ширење на делта сојот е главно последица на епидемијата што се појави кај две групи ученици кои се вратиле од училишно патување во Шпанија на почетокот на јули.
Во исто време, алфа варијантата, која за прв пат беше откриена во Велика Британија, беше потврдена во помалку од седум проценти од анализираните примероци оваа недела.
