Италијанската научничка и виролог Илариа Капуа, професорка на американскиот универзитет во Флорида, тврди дека светот и следната година ќе се бори со коронавирусот.

„Погрешно е да се верува дека вирусот не постои, за жал тука е околу нас и ќе мораме да најдеме начин да живееме со него и да го организираме нашиот живот бранејќи се од заразата. Точно е дека вирусот се менува, ќе имаме периоди кога помалку ќе се шири, како на лето кога имаше помалку заразени, но коронавирусот и понатаму е опасен и бројот на заразени ќе расте“, навела таа.

Како што додава, посебно внимание треба да се усмери кон растото на заразените во одделенијата за интензивна нега, што е показател дека коронавирусот се шири и дека треба итно и одлучно да се реагира.

Според неа, до пронаоѓање на ефикасна вакцина против Ковид-19 ќе помине многу време, а и кога ќе се пронајде делотворна вакцина ќе биде потребно време пред целата популација да се вакцинира.