Денеска (14.09.2021) во Скопје заменик министерот за внатрешни работи на Република Чешка Јиржи Новачек на министерот Оливер Спасовски му ја врачи донацијата- возила наменети за Одделот за организиран и сериозен криминал, кои ќе помогнат за уште подобри резултати на оваа организациона единица. Овие возила се набавени по пат на спроведување на постапка за јавна набавка на возила, а со наменски добиени средства со донација од страна на Република Чешка, при што се набавени неколку видови на возила за потребните на разни служби во Министерството.

За Одделот за организиран и сериозен криминал се набавени осум возила „шкода октавија“ (дизел) и пет возила „шкода скала“ (бензин), сите со Еуро 6 мотор со јачина од 115 коњски сили и потрошувачка помалку од 4 литри гориво на 100 километри, опремени со високо ниво на додатна опрема, што гарантира високо ниво на безбедност на службениците кои ќе ги користат на разни задачи. Возилата од денес ќе бидат во функција со цел зголемена оперативност на Одделот.

Делегацијата на Министерството за внатрешни работи на Република Чешка, предводена од заменик министерот за внатрешни работи Јиржи Новачек, од вчера е во посета на Република Северна Македонија. На вчерашната билатерална средба уште еднаш беше потврдена одличната соработка меѓу двете министерства и двете држави, а министерот Спасовски и заменик министерот Новачек потенцираа дека одличната соработка ќе продолжи и во наредниот период.